МИА, 15.05.2010

Припадници на единицата за антитероризам при германската полиција по деталната проверка на авионот на летонската авиокомпанија „Ер Балтик“, што попладнево слета во вонредни околности на берлинскиот аеродром „Тегел“ поради добиената телефонска закана за поставена бомба, не открија никаква експлозивна направа.

– Заканата за поставена бомба се покажа лажна, соопшти претставник на германската полиција. Попладнево во седиштето на „Ер Балтик“ телефонски се јавило анонимно лице кое рекло дека во авионот „Фокер 100“, кој веќе се наоѓал на лет од Рига кон Берлин, е поставена бомба. Веднаш по слетувањето во „Тегел“, сите 74 патници и членови на екипажот беа евакуирани од леталото и пренесени во аеродромската зграда. Во средата германската полиција на аеродромот „Тегел“ уапси две лица поради сомнеж дека планираат да киднапираат авион на релацијата Берлин-Москва. Приведените беа ослободени откако беше утврдено дека станува збор за пилоти на руска авикомпанија.