Агенцијата за цивилно воздухопловство, како општествено одговорна компанија и регулатор на македонското цивилно воздухопловство во земјава, викендов, беше дел од воздухопловниот саем, кој во организација на Здружението за подобро воздухопловство „Авикон“,викендов по четврти пат, се одржа во градскиот парк во Скопје.

АЦВ, на саемот, покрај со свој промотивен пулт, беше застапена и преку тим од инспектори за надзор над безбедноста и сигурноста во воздушниот сообраќај, надзор над воздухопловните пристаништа во земјава,  заштитата на правата на патниците во воздушниот транспорт, кои се обидоа да ја задоволат љубопитноста на големиот број млади посетители, кои сакаа да дознаат, со кои се предизвици треба да се соочат за да стигнат до пилотска дозвола, како да се стекнат со сертификат за контролор на летање, кои се надлежностите на инспекторите за безбедност во воздушниот сообраќај и многу други прашања и одговори.

Целта на одржувањето на Саемот на воздухопловство, во организација на Авикон е популаризација на воздухопловните професии меѓу младата популација, како и промоција на воздухопловната професија, како значајна карика за развој на општествено економскиот систем во земјата.

На едно место во исто време, зад промотивните пултови на субјектите од воздухопловната индустрија и надлежните воздухопловни институции, се најдоа, контролори на летање, пилоти, воздухопловни инженери, инспектори, за безбедност и сигурност во авиосообраќајот од АЦВ и друг воздухопловен персонал, кои со својата комуникациска умешност се обидоа да ги пренесат своите вештини и знаењата со кои располагат носителите на овие значајни позиции во воздухопловниот сектор.