МИА, 23.06.2010

Скопје, 21 јуни 2010 (МИА) – Македонскиот министер за одбрана Зоран Коњановски и амбасадорот на Полска во Македонија Карол Бакура денеска потпишаа Спогодба за соработка во областа на одбраната меѓу владите на двете земји.

Спогодбата за соработка во областа на одбраната ги содржи општите принципи за одбранбената соработка меѓу Република Македонија и Република Полска, заснована на принципите на еднаквост, партнерство и меѓусебна корист.

Со Спогодбата, како што појасни Коњановски, се предвидува продлабочување на соработката преку директни средби на министрите за одбрана, началниците на генералштабовите, командите на копнените сили, воздухопловството, како и размена на искуства на експертско ниво, политичко-воени консултации, организирање на семинари, учество на набљудувачи на воени вежби, учество во мировни и хуманитарни операции итн.- Соработката меѓу Македонија и Полска е воспоставена уште во 1996 година, но сметавме дека е добро да имаме една возобновена спогодба за соработка во однос на одбраната потпишана под уставното име на Република Македонија, рече македонскиот министер, додавајќи дека со денешната Спогодба се потврдуваат македонските заложби за партнерство со Полска.

Амбасадорот Бакура потенцира дека со потпишувањето на Спогодбата ќе се овозможи нејзино исполнување преку дела, а не само преку зборови.

– Ние соработуваме и учествуваме заедно во мисијата во Авганистан и во некои други мисии и верувам дека со оваа соработка ќе се продлабочи помеѓу двете држави во полето на одбраната и во сите сектори, рече полскиот амбасадор. Министерот Коњановски потсети дека Полска е земја која има повеќе од 2.500 свои припадници на армијата ангажирани во Авганистан и оти Македонија со повеќе од 250 припадници на АРМ ангажирани во оваа мисија е земја која силно партиципира во зачувување на глобалната безбедност. – Имаме доволно научени лекции кои можат да бидат во функција на уште поголема подготвеност и обука на припадниците на вооружените сили на двете земји, додаде тој. дма/са/13:38